紅葉斜落九州北部時

美食旅客 2018年2月19日更新

紅葉暢遊九州福岡長崎大分九州地區

吃了東坡肉，去吃鹹湯圓。鹹湯圓？不就是我們小時候過節，媽媽會做的那種嗎？一煲起，那冬菇和糯米的香氣，溢滿了一屋，溫暖和歡樂，也溢滿一屋。

戀戀鹹湯圓銀座食堂

門口低調得緊要，一般遊客點會入嚟。

原來日本人，也吃鹹湯圓。

島原市那邊，有條中堀町，不是甚麼著名商店街，白天走進去，大都是歐巴桑、老頭兒，兩旁商店，賣的都是水桶、睡衣、地拖棍等生活用品。

寂靜。寂靜。寂靜。寂靜到一般遊人根本提不起勁進去。

鼓起探索精神吧！說不定裏面會有寶。

對！裏面真的有寶。就在商店街尾，有一所很老舊的食店。

古老的門面，彷彿回到昭和時代。一塊名牌，寫着：島原名物具雜煮。一幅放大了的劇照，一男一女兩個主角，很面熟。

一齣日劇，令這裏變成朝聖地。

「呢齣係好受歡迎嘅日劇嚟架，個個師奶太太都識！」負責翻譯的小姐說。

吉永小百合呀！

即刻Google一下，果然人氣，這日劇叫：《まぼろしの邪馬台国》(中譯虛幻的邘馬台國)，由日本師奶殺手綾小路きみまろ主演，女主角係風韻猶存嘅吉永小百合。2008年上演，口碑很好。原來取景之地，就係我眼前呢間舊食店，自此也水漲船高，大受歡迎，真係失敬失敬。

成幅牆都係明星照，日本人個個認得出名。

入嚟要坐榻榻米，舊到呢！

唔理齣劇，這店真的很有mood。

一張門幡，大大隻元祖具雜煮本舖書法字。走廊兩壁，貼滿古舊明星劇照海報。鑽進內室，是榻榻米坐位，客人人個個坐在矮矮的枱，看電視，等嘢食。

我哋嘅鹹湯圓，喺日本變咗具雜煮，一樣的過節味道，一樣的溫暖。

食乜嘢？咪具雜煮囉！

具雜煮，即係鹹湯圓，係島原縣特式鄉土料理囉，九百八十円一碗，用小陶鍋㷫住上。用匙羮一撈，湯圓雞肉魚肉玉子蓮藕冬菇雜菜獅子狗……雜崩冷煮埋一碗熱辣辣陣味真係好似過年。食一啖，湯頭充滿冬菇香氣，那軟腍腍的湯圓，煙韌黏糯，香港人啱食。食完一鍋，個肚飽晒，成身暖笠笠。其實好唔好食唔重要，嚟呢啲地方，已經超越呢個層次。如果你係文青，最緊要係影相。

信我，呢間店，啱你喇！