開車離開福岡，下一站就到大分縣。先去日田市逛逛街吧！日田市有一條豆田町，由豆田上町通及豆田御幸通兩條街組成，唔算好大，但保留咗好多江戶時代建築。建於1934年嘅草野藥局、有170年歷史嘅日田醬油本店，都已成為國家指定重要文化財產。街上又有好多人氣手信店，從羊羮到日本屐，從人形偶到古董陶瓷都有，慢慢逛慢慢睇，可以消磨一個上午。

豆田町
網址：http://www.hita-mameda.jp/

樸拙的門簾，光看也是美。

賣日本屐的店舖，少說也有幾百種款式，花多眼亂。

古屋老街，有濃烈悠閒感。

離開豆田町，驅車往玖珠郡九重町，目的就為了看全日本最高行人大吊橋。九重夢大吊橋，耗資近20億日圓，2006年10月開放，遊人已破一千萬。390公尺長橋，下面是九醉溪溪谷，旁邊是被列入日本瀑布百選的震動の滝雄瀑和雌瀑，站在橋上看，好壯觀。從中村區朝北方區行，十多分鐘完成，不過173呎高空，望落去，真係一步一驚心。

九重夢大吊橋
地址：九州大分縣玖珠郡九重町大字田野1208番地
電話：+81-0973-73-3800
網址：http://www.yumeooturihashi.com/twn/access.html

瀑布好壯觀，沖落嚟連橋都震動。

全日本最高行人吊橋，點都要嚟一次啦！

嚟到大分縣，冇理由唔去一個地方。對對對！就係由布市嘅湯布院町，幾條小街，一個小區，卻滿布各式各樣店舖。咖啡廳、甜點鋪、雜貨店與百年醬油老店、製菓名店，櫛比鱗次。而且，超多人氣店進駐，真係買嘢試食都手軟口軟呀！超人氣忌廉蛋糕卷店B SPEAK，蛋糕卷我下晝去到已經賣晒！賣布丁銅鑼燒嘅花麹菊家，門口永遠都有一條長龍。以大豆冬甩著名嘅nicoドーナツ，冇一般冬甩咁甜咁油，好食。和菓子甜點店鞠智嘅可樂餅，用大分縣豊後牛做餡，炸到香噴噴。咪忘記去Bee Honey食蜂密雪糕啊！仲有Milch嘅芝士蛋糕，半熟狀態，可冷可熱，正！仲有全店都係貓產品嘅由布院の猫屋敷、全店都係狗產品嘅ゆふいんの犬屋敷，貓奴狗奴夠洗袋。逛完就去金鱗湖行下啦！外陽照落湖面，好似魚鱗金光一樣咁靚，影多啲相啦喂！

湯布院町
地址：大分縣由布市湯布院町一帶
網址：https://www.welcomekyushu.tw/event/?mode=detail&id=9999900000574&isSpot=1&isEvent=

超人氣忌廉蛋糕卷店B SPEAK，未收舖已經賣晒！

七彩棉花糖，又靚又好食。

好多人好多人好少見到咁多人！

從由布市開車往海邊的別府市，沿路景色優美。到別府，夜晚當然浸溫泉，但入黑前，要登山。海拔1,375米嘅鶴見岳，可眺望別府市、別府灣、由布嶽、九重山脈……甚至本州及四國。登山可以坐別府空中纜車，大人來回1,600日圓，20分鐘一班，每個車廂可載101人，從玻璃窗望出去，四時景色不同，十分美。纜車建於昭和37年，即1962年，服務超過半個世紀了，不過老當益壯，值得信頼呀！

別府空中纜車
地址：九州大分縣別府市大字南立石字寒原10-7
電話：+81-0977-22-2279
網址：http://www.beppu-ropeway.co.jp/leaflet/leaflet_cn02.pdf?d=20150504

落地玻璃窗，景色一覽無遺。

別府市和別府灣，就在腳下。

坐纜車登山，沿途景色靚絕！